Proxectan un edificio de vivendas turísticas e un albergue na Enfesta de San Telmo
Por Alejandro Espiño
O 'boom' turístico que, segundo todas as previsións, vivirá Galicia en 2021 coa celebración dun novo Xacobeo está a animar aos emprendedores a apostar por proxectos inmobiliarios pensados para as residencias temporais de turistas.
O edil de Urbanismo, Xaquín Moreda, desvelou que o centro histórico é a zona da cidade elixida para dúas destas novas iniciativas. En concreto, a Enfesta de San Telmo, situada nas inmediacións do Parador de Turismo.
Nesta rúa, que une o ámbito de Santa María co parador, rehabilitaranse dous edificios actualmente desocupados.
Un destes inmobles será reconvertido nun albergue turístico, similar aos que comezaron a proliferar en diferentes puntos da cidade.
O outro proxecto prevé rehabilitar o edificio para destinalo integramente a vivendas de uso turístico. Isto é así porque a normativa urbanística de Pontevedra impide que nun mesmo edificio haxa domicilios residenciais e vivendas que se aluguen a turistas.
Este edificio, que actualmente ten uso residencial, poderá acoller vivendas turísticas tras un cambio de usos que autorizou a comisión de Urbanismo.
O proxecto presentado inicialmente recolle a rehabilitación das dúas plantas do inmoble, pensadas para un total de oito apartamentos, aínda que os novos requirimentos dos técnicos municipais poderían obrigar os seus promotores a reducir este número.