Axuda á asociación de Parkinson de Pontevedra a gañar 5.000 euros no concurso solidario 'Contigo, 50 y más'
Por Redacción
Coa intención de mellorar a mobilidade das persoas que teñen parkinson, a asociación provincial Parkinson de Pontevedra presentou un proxecto a través de Cinfa, un laboratorio farmacéutico de capital español que puxo en marcha a campaña 'Contigo, 50 y más'.
Este laboratorio escolleu 50 proxectos para participar neste certame. Entre eles atópase a proposta de Fisioterapia do colectivo pontevedrés, que consiste en atrasar a progresión dos aspectos motores da patoloxía e mellorar a súa autonomía para realizar actividades cotiás a través de tratamento empregando a terapia física de forma continuada para reforzar o nivel físico e funcional dos pacientes.
A iniciativa contempla a mellora de coordinación, equilibrio, prevención de caídas e redución da dor e da rixidez, ademais de educar en hábitos de vida saudables.
A asociación provincial Parkinson de Pontevedra leva máis de 3.500 votos nesta campaña e o obxectivo é que o 30 de setembro sexa unha das cinco máis votadas para que logren 5.000 euros, que permitirán desenvolver este proxecto. Por este motivo levan a cabo unha captación de apoios a través das redes sociais co obxectivo de que todas as persoas que se queiran sumar voten a súa candidatura aos premios nesta ligazón.
Este colectivo provincial de axuda a persoas con parkinson conta con sede en Bueu e forma parte da Federación Española de Parkinson.