Trinta empresas pontevedresas contrataron 63 persoas de colectivos desfavorecidos
Por Oskar Viéitez
A presidenta da Asociación de Jóvenes Empresarios (AJE) de Pontevedra, Lucía Pedroso; o director de área de negocio de LaCaixa en Pontevedra, Antonio Lema, o presidente de COGAMI, Anxo Queiruga, e Carlos Roson en representación do Grupo Incorpora Galicia, asinaron un acordo que ten como obxectivo fomentar a integración laboral de persoas con especiais dificultades para acceder a un posto de traballo e promover accións de Responsabilidade Social Empresarial no marco do programa Incorpora.
Dende o ano 2006 o programa Incorpora persegue a inserción ao mundo laboral de persoas en situación ou risco de exclusión, como persoas con minusvalidez, maiores de 45 anos, parados de longa duración, inmigrantes, mozos en situación de vulnerabilidade e vítimas de violencia de xénero, entre outros colectivos.
A Asociación de Jóvenes Empresarios de Pontevedra colaborará con Incorpora mediante a organización de accións e actividades concretas no ámbito da responsabilidade social empresarial, "sistematizando a mellora continua no uso dos recursos para facer sostibles os resultados e o compromiso coa sociedade".
Pola súa banda, Incorpora prestará información e asesoramento especializado a esta asociación de empresarios sobre subvencións e axudas á contratación e á creación de emprego para persoas con especiais dificultades de inserción.
Malia a crise este programa conseguiu facilitar 63 postos de traballo na provincia ao longo de 2012.
Isto foi posible grazas á implicación de trinta empresas pontevedresas neste proxecto de responsabilidade social corporativa. Catro entidades sociais son as encargadas de desenrolar Incorpora en Pontevedra: Feafes Galicia, Cogami, Fundación Erguete Integración e Igaxes3.