Ribadumia pasa a ser entidade local en contra da violencia de xénero
Por Redacción
O Concello de Ribadumia vén de adherirse ao protocolo de colaboración asinado entre a Secretaría Xeral da Igualdade e a Fegamp para establecer unha rede de entidades locais en contra da violencia de xénero, o que tamén permitirá realizar accións encamiñadas á sensibilización social.
A alcaldesa, Salomé Peña, destaca a "importancia" de formar parte deste proxecto, "xa que supón dar un paso máis na loita contra a lacra social que supón a violencia de xénero. Todos debemos sensibilizarnos con este problema, actuar e non descansar mentres haxa unha soa vítima. A violencia de xénero é unha lacra da nosa sociedade, un problema ao que aínda se enfrontan algunhas das nosas veciñas e, polo tanto, tamén nós".
A rede de entidades locais en contra da violencia de xénero configúrase como un instrumento que permita conseguir o rexeitamento social e institucional da violencia de xénero, sensibilizando á poboación e conseguindo a súa implicación e o seu compromiso real contra esta lacra, fomentando ao mesmo tempo modelos alternativos de convivencia baseados no respecto e a igualdade.