Adeus ás árbores que obstaculizan o paso do río dos Gafos
Por Redacción
As árbores que obstaculizan a canle do río dos Gafos no seu tramo urbano por Pontevedra teñen os días contados. Se ben hai algunha que leva tempo aí, a maioría proceden do temporal de forte vento de hai apenas dúas semanas. Unhas e outras desaparecerán o luns.
Algúns operarios xa se puideron ver retirando ramas e troncos no tramo que discurre parello á rúa Rosalía de Castro na tarde do venres, pero a Xunta de Galicia ven de anunciar que Augas de Galicia iniciará unha limpeza intensa a partir do luns, día 22.
O tramo obxecto da limpeza ten unha lonxitude de 20 metros e para limpalo necesitarase motoserras e un tractor con pinza e cable. Non só retirarán árbores caídas ao leito do río, senón toto tipo de restos vexetais.
As obras de limpeza centraránse nun treito do río dos Gafos ao seu paso pola rúa da Ponte Nova e teñen como fin facilitar o paso da auga.
Trátase de actuacións enmarcadas no programa de mantemento e conservación do dominio público hidráulico da bacía de Galicia-Costa área Sur e as súas zonas de acceso e protección.