Tírase ao río para escapar da Policía e descobre que a marihuana flota
Por Oskar Viéitez
O protagonista desta historia é un mozo de 21 anos de idade que foi imputado por un delito de tráfico de drogas e outro de resistencia e desobediencia a un axente da autoridade.
Segundo a información trasladada polo portavoz da Policía Local, Manuel Omil, os feitos tiveron lugar o pasado mércores 5 de xuño, sobre as 20:15 horas, cando unha patrulla realizaba labores de vixilancia pola rúa Rafael Areses observa como á altura das escaleiras metálicas situadas no Pazo da Cultura encontrábase un vehículo estacionado e xunto ao mesmo un grupo de mozos consumindo bebidas alcohólicas.
Por tal motivo, ao tratarse dun lugar frecuentado por diversas persoas para o consumo de substancias estupefacientes, así como a proximidade de varios centros escolares, os axentes diríxense ata o mencionado grupo de mozos.
O responsable do vehículo, un Fiat Punto, era un rapaz de 21 anos que explicou aos municipais que o coche era da súa nai. Ao abrir o turismo para recoller a documentación os policías observan como no interior deste había restos procedentes do consumo de substancias estupefacientes "ademais despréndese un forte olor a marihuana".
Nun rápido rexistro os axentes encontran restos de filtros polo chan, así como unha gran cantidade de "cabichas de porros" depositadas no interior dun vaso de plástico utilizado como cinceiro.
Ata aquí a intervención policial desenvolvíase con normalidade, pero foi no momento no que os axentes se dispoñían a comprobar os efectos que levaba no maleteiro do coche o mozo empurra a un dos axentes, arrancándolle da man unha bolsa de plástico cun bote de cristal bastante grande no interior e empeza a correr.
Na súa fuxida o rapaz empurra o outro policía do que consegue zafarse tras golpealo nun brazo. Iníciase entón unha persecución a pé pola rúa Rafael Areses. Ao chegar á varanda que separa o río Lérez sáltaa á carreira golpeándose a cabeza contra as pedras que fan de dique.
A "trompicones" o mozo diríxese cara á auga coa bolsa de plástico e o bote, somerxéndose na auga e mergullándose para enterrar o bote coa bolsa no lama do fondo do río. O seu propósito era destruír as posibles probas incriminatorias. No momento dos feitos o río encontrábase coa marea baixa.
Os axentes dende a beira pídenlle a gritos que saia da auga para evitar un mal maior. Pero cando creu rematada a súa manobra e o mozo se achegaba cara a eles empezaron a saír a flote ao seu arredor "pequenos paquetes envolvidos en papel de xornal en cuxo interior se puido comprobar que había cogollos de marihuana". Os policías puideron recuperar oito envoltorios con dita droga.
Ao ser trasladado a Comisaría comunicóuselle que está imputado por dous delitos, un por tráfico de drogas e outro de resistencia e desobediencia a un axente da autoridade.