Alcaldes cataláns visitan Pontevedra para coñecer a súa transformación urbana
Por Redacción
Unha delegación de responsables políticos da Asociació Catalana de Municipis estivo este venres na cidade de Pontevedra para coñecer a súa transformación urbana. Foi unha viaxe que realizaron expresamente con este fin.
Entre os asistentes estaban, entre outros, o secretario xeral da asociación e alcalde da Seu d’Urgell, Albert Batalla, que veu acompañado de numerosos rexedores municipais.
Así, na Boa Vila desembarcaron os alcaldes e alcaldesas de Girona, Marta Madrenas; Vic, Fabiana Palmero; Sant Cugat, Carmela Fortuny; Les Borges Blanques, Enric Mir; Sant Quintí de Mediona, Pol Pagès; Sant Sadurni d´Arnoia, Josep María Ribas; Sant Climent de Llobregat, Isidre Sierra; ou Francina Vila, concelleira de Barcelona.
Á súa chegada ao Concello foron recibidos polo alcalde Miguel Anxo Fernández Lores, e recibiron unha exposición teórica por parte do director xeral de Urbanismo, Xosé Manuel Tato e do intendente principal, Daniel Macenlle.
Tras iso, realizaron unha visita pola cidade e, ademais de ver o modelo na práctica, puideron resolver as dúbidas que expuxeron no consistorio.
Os alcaldes cataláns principalmente se interesaron pola xestión do estacionamento na cidade, polos investimentos que foron necesarios para executar toda a transformación urbana ou se se percibiron axudas doutras administracións.
Logo dunha comida oficial, os alcaldes percorreron a cidade para comprobar os estacionamentos de bordo ou a xestión da mobilidade e do tráfico.