As brigadas da Deputación actuaron en 180 emerxencias na zona centro da provincia
Por Redacción
Ata 180 emerxencias en viarios da zona centro da provincia atenderon as brigadas de mobilidade da Deputación de Pontevedra durante o ano 2018. As actuacións por accidentes de tráfico foron as máis numerosas, tras baixar as incidencias pola climatoloxía.
Foron os municipios de Caldas de Reis, Moaña, Barro e Pontevedra, atendidos por tres brigadas con base en Pontevedra, os que máis medios precisaron.
O resto dos concellos atendidos na zona centro foron Bueu, Cambados, Campo Lameiro, Cangas, Cotobade, Cuntis, Catoira, O Grove, Illa de Arousa, Marín, Meaño, Meis, Moraña, Pontecesures, Portas, Poio, Ribadumia, Sanxenxo, Valga, Vilaboa, Vilagarcía de Arousa e Vilanova de Arousa.
En total, en toda a provincia atendéronse 470 actuacións de emerxencia, a cifra máis baixa dos tres últimos anos.
As borrascas, de menor intensidade, crearon menos complicacións e non foi preciso facer tantas saídas por retirada de árbores, nevadas ou inundacións o que motivou, segundo confirmou o deputado responsable do departamento de Mobilidade, Uxío Benítez, que as actuacións por accidentes de tráfico volveran ser as máis numerosas.
As actuacións de emerxencia das brigadas de mantemento da mobilidade das estradas provinciais, lembra Benítez, son a resposta aos avisos chegados a través da Unidade de Control e Vixilancia da Deputación, que recibe e organiza as chamadas do 112, gobernos locais e outros servizos de emerxencia de toda a provincia durante as 24 horas do día, 365 días.
As incidencias máis habituais foron o soporte e atención en accidentes de tráfico para sinalizar o suceso, retirar elementos da calzada ou baldear a vía no caso de que se derramaran líquidos (156); as retiradas de pólas e árbores nas calzadas (108); desprendementos de noiros con terra e pedras (48); a recollida de animais soltos (44); fochancas (31); asolagamentos (24); así como saídas por nevadas ou xeo (15); e outras actuacións variadas (semáforos sen funcionamento, retirada de tapas de sumidoiros, postes caídos ou retirada de metais).
Por meses do ano, a mínima de actuacións de emerxencia das brigadas rexistrouse no mes de setembro con 16 e a máxima no mes de novembro con 81, sendo o inverno e a primavera as estacións que acumularon máis actividade.