Pontevedra achégase ás Primaveras Árabes e ao Rif da man de David Alvarado
Por Redacción
O politólogo, xornalista e consultor David Alvarado achegará este xoves aos pontevedreses a realidade das revolucións das denominadas 'primaveras árabes' e da situación que se está a vivir no Rif, en Marrocos. Será a través dunha conferencia organizada polo Instituto Galego de Análise e Documentación Internacional (IGADI).
A actividade, titulada 'Primaveras árabes e revolta do Rif en Marrocos', está prevista para as 20.00 horas deste xoves 20 de decembro na Casa das Campás de Pontevedra e está aberta a toda a cidadanía. A entrada é de balde ata completar aforo.
Instalado en Rabat dende 2003, David Alvarado combina o seu traballo no ámbito académico e da investigación co xornalismo, sendo correspondente para o Norte de África de diversos medios de comunicación coma o xornal La Voz de Galicia, Radio Euskadi, Televisión de Galicia, ou CNN +. Ademais, é autor de numerosos artigos académicos e análises sobre variadas cuestións políticas relacionadas co Magreb e o Norte de África.
David Alvarado é profesor asociado na Universidade Internacional de Rabat (UIR) e investigador asociado do Centro d'Etudes et Recherches en Sciences Sociales (CERSS) de Rabat e do Instituto Galego de Análise e Documentación Internacional (IGADI). O seu último libro é Rif: De Abdelkrim a los indignados de Alhucemas, de Edicións La Catarata, editado no 2017.