O PP de Pontevedra e Poio celebra o Nadal cos seus afiliados e simpatizantes
Por Redacción
As agrupacións locais do PP de Pontevedra e de Poio celebraron esta fin de semana o Nadal con sendas cea e comida de confraternidade con afiliados e simpatizantes ás que non faltaron os responsables do partido en cada municipio e cargos provinciais.
O PP de Pontevedra optou por unha cea de Nadal na noite deste sábado á que asistiron o presidente local, Rafa Domínguez; o presidente provincial, Alfonso Rueda; a presidenta do Congreso, Ana Pastor; ou a deputada Pilar Rojo.
Ademais de celebrar as festas, aproveitaron a ocasión para render homenaxe ao veterano Arturo Pichel, a quen se referiron ironicamente como "el más joven del Partido Popular" e entregaron unha placa en recoñecemento pola súa traxectoria e o apoio á formación.
No caso de Poio, máis de 150 convidados participaron no tradicional xantar de Nadal celebrado este domingo. Ademais do presidente local, Ángel Moldes, estiveron o grupo municipal, a executiva local do Partido, Alfonso Rueda, e Ana Pastor, que aproveitaron para desexar unhas Boas Festas aos afiliados e simpatizantes "da gran familia do PP de Poio".