Éxito de recadación de alimentos no concerto solidario de 'Os Catro Ventos' en Ponte Caldelas
Por Redacción
O concerto solidario ofrecido polo grupo 'Os Catro Ventos' fixo posible este sábado a recadación en Ponte Caldelas dunha gran cantidade de alimentos non perecedoiros que serán entregados a entidades sociais e aos servizos sociais municipais para o seu reparto entre persoas vulnerables.
O evento musical celebrouse na discoteca de Ponte Caldelas e subiu ao escenario máis de 40 músicos procedentes de Ponte Caldelas, A Lama, Fornelos e Cerdedo-Cotobade no marco do Decembro Solidario programado polo Concello.
A actuación, que concitou a presenza de numeroso público que enchía o local, serviu para a presentación dos primeiro disco desta agrupación de música tradicional, Noutrora.
A actuación tivo un formato de teatro musicalizado e baseouse nun guión a partir dunha carta que unha muller remite ao seu namorado. A partir de aí foron debullándose escenas típicas galegas de mediados do século pasado.
Baixo a dirección de Andrés Lorenzo, 'Os Catro Ventos' contou coa colaboración doutros músicos como Xulio, de 'Os Alegres' Iván Gulín; Juan Viñas; José Alonso; e Samuel Soto. Tamén houbo figurantes e músicos procedentes de agrupacións 'irmáns' como 'Os Coribantes de Buchabade', 'Son da Pedra' e 'Aires de Cobres'.