Agárdanse chuvascos durante toda esta semana nas Rías Baixas
Por Redacción
As Rías Baixas permanecerán este luns baixo a influencia das baixas presións situadas cara ao oeste, moi preto do litoral atlántico de Galicia. Espérase unha xornada de ceos parcialmente cubertos con chuvascos desde primeiras horas do día. E faranse máis frecuentes e xeneralizados a medida que avance o día, segundo a previsión do servizo de Meteogalicia.
As temperaturas sitúanse entre os 12 e os 21 graos, con ventos que soprarán frouxos con predominio de compoñente leste.
Durante o martes 20 presentarase un centro de baixas presións sobre a vertical de Galicia. Os ceos continuarán parcialmente cubertos con chuvascos máis probables e intensos na metade oeste. As temperaturas sufrirán un descenso, máis acusado nas máximas, establecéndose entre os 11 e os 15 graos. O vento soprará frouxo de dirección variable.
As Rías Baixas manteranse afectadas polas baixas presións situadas ao oeste de Fisterra durante o mércores 21. De novo rexistraranse choivas probables, sobre todo na franxa atlántica coa posibilidade de que se produzan tormentas acompañadas de aparato eléctrico. As temperaturas permanecerán entre os 9 e os 14 graos, con vento que soprará de compoñente sur, con refachos fortes no litoral e nas zonas altas.
Cara á parte final da semana, manteranse as borrascas atlánticas con ventos con compoñente sur. As temperaturas serán as habituais desta época do ano, entre 8 e 12 graos.