A Rúa da Igrexa, ateigada de xardineiras
Por Redacción
O Concello de Ponte Caldelas instalou unha trintena de xardineiras na Rúa da Igrexa.
Trátase dunha medida adoptada tras as queixas veciñais rexistradas ao detectarse un problema co aparcadoiro incontrolado de coches nunha zona que conta con tránsito semipeonil.
O goberno local descartou recuperar os bolardos retirados hai uns anos, polo que se optou por outro elemento como as xardineiras para que contribúan á ornamentación da vila.
As novas xardineiras, que foron fabricadas por unha empresa local, deixan un espazo libre á altura da Administración de Loterías e dunha consulta médica, onde se instalará un sinal de aparcadoiro limitado, segundo sinala o Concello.
Nos próximos días plantaranse as flores que decorarán, de agora en diante, esta céntrica rúa.