O 2 de xuño, Cuspedriños será sinónimo de feira
Por Redacción
Hai xa sete anos que o Concello de Cotobades recuperou unha das súas tradicións máis arraigadas na poboación, a feira de Cuspedriños. O mercado rememora o que se celebraba na zona a mediados do século XX e durante un día transporta a todos os asistentes ao século pasado.
Este 2013 a sétima edición da feira chegará o 2 de xuño e dende o Concello convidan a todos os veciños e visitantes a que desempolven as roupas dos seus avós e avoas (boinas, chalecos, chals, panos, cestos,.... ) e que se vistan dos anos 50-60 e se acheguen a Cuspedriños para disfrutar dunhas xornadas emocionantes e divertidas.
A feira tradicional de Cuspedriños adoitaba realizarse no terceiro domingo de maio neste lugar da parroquia de San Xurxo de Sacos. O 2 de xuño os asistentes poderán revivir o esplendor da feira que foi o referente da economía desa época.
Aínda que inicialmente esta feira era de gando na actualidade tratase de exaltar os productos artesanais e a gastronomía da feira. Así, poderanse atopar productos alimenticios e artesania producidos por artesáns de Cotobade e doutras partes do territorio expostos na terraza da carballeira.
O gando e a agricultura segue estando presente na feira, coas exposición de razas autóctonas, como galiña de Mos ou porco celta, todo no entorno do curro. No entorno do Mercado tradicional están situados os productos de alimentación: pan, queixo, embutidos, requeixo, viño, filloas,...
A Feira desenvolvese durante toda a xornada, contando con diferentes actividades de animación e entretemento. O programa pode consultarse aquí.