Unha xornada de barranquismo para presumir do Verdugo
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/b12/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5b9654b023-p9093298.jpg)
© Concello de Ponte Caldelas
![](/web/cache/scene/uploads/fotos/foto/35a/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5b9654f66f-p9093627.jpg)
© Concello de Ponte Caldelas
O Concello de Ponte Caldelas ofreceu este domingo unha sesión de barranquismo gratuíta e aberta á súa veciñanza, no marco da campaña de promoción do turismo verde.
A sesión, na que participaron 13 persoas, entre as que estaba o alcalde, Andrés Díaz, forma parte do acordo coa empresa Galaicaventura, que opera de xeito regular durante todo o ano e goza de facilidades para utilizar espazos municipais como centro de recepción e servizo de vestiario.
Os datos da empresa operadora indican que o barranco do Verdugo, formado por tres cascadas consecutivas nunha paisaxe rochosa, experimenta un importante crecemento, o que significou dobrar o número de grupos que se desprazaron ao longo deste verán para achegarse ou perfeccionar a práctica desta modalidade.
O descenso do barranco, cunha duración de case catro horas, non require de coñecementos previos, pois os monitores dan todas as instrucións precisas e achegan o equipamento necesario. A seguridade é a máxima prioridade na totalidade do percorrido e todos os puntos dificultosos contan con alternativas máis doadas.
Esta zona do río Verdugo, en Ponte Caldelas, é o lugar de adestramento da Garda Civil de montaña para simular situacións de rescate.