O home que acabou detido tras intentar facer un 'simpa' estivo toda a tarde de ronda
Por Natalia Puga
O home de 45 anos detido na tarde do martes pola Policía Local tras intentar facer un 'simpa' de tres cervexas e montar un pequeno escándalo na rúa Marquesa pasárase toda a tarde de rolda pola cidade alterando a orde e a tranquilidade de veciños e hostaleiros.
Segundo indicaron fontes policiais, cando ás 18.00 horas a Policía Local tivo que reducilo e detelo o home xa acumulaba incidentes noutro bar da rúa Castelao e mesmo nun edificio da rúa Frei Juan de Navarrete.
A rolda deste particular 'tuno' polas rúas de Pontevedra comezou ás 16.00 horas no bar Castelao. Foi necesario que acudise a Policía Nacional para que o home, en aparente estado de embriaguez, deixase de importunar no interior do establecemento.
A pesar de que os axentes lle chamaron a atención, non aprendeu a lección e tan só 45 minutos máis tarde tivo que intervir outra patrulla. Nesta ocasión, foron os veciños do edificio situado ao lado do antigo cine Gónviz os que requiriron a presenza policial. Supostamente, este home entrou no edificio e empezou a molestar os veciños, que non conseguiron calmalo ata que chegou a Policía.
Cando parecía que se calmara, chegou con outro home á bocatería Sánchez da rúa Marquesa, consumiron tres cervexas, quixeron irse sen pagalas e xa se derivou nun incidente no que tivo que intervir a Policía Local e se lle detivo por atentado a axente da autoridade.