Portas alerta os seus veciños: unha banda de ladróns anda solta e fanse pasar por policías
Por Natalia Puga
O alcalde de Portas, Roberto Vázquez, está preocupado pola seguridade dos veciños do concello e emitiu un bando moi pouco habitual no que lles pide que extremen as precaucións para evitar ser vítimas de roubos nas súas vivendas.
O rexedor alerta que en concellos limítrofes "se está a producir unha ondada de roubos en vivendas" e explica que a forma de actuar do grupo é a de "facerse pasar por membros da Policía ou a Garda Civil para proceder a un rexistro domicilitario".
Ante a constatación desta ondada de roubos, quere evitar "que isto poida suceder no noso concello", de aí que decidise poñer "en sobreaviso" a todos os veciños para que "adopten as medidas oportunas".
O bando ou "aviso urxente" emitiuse este martes 14 de maio e empezou a circular polas redes sociais, en particular, polo Facebook. Nel, Roberto Vázquez aproveita para facilitar aos veciños o teléfono do cuartel da Garda Civil de Caldas de Reis, a localidade máis próxima con sede das Forzas de Seguridade.