Dous detidos como presuntos autores de agresións ás súas parellas mentres conducían
Por Redacción
Dous sucesos producíanse este sábado en circunstancias similares. Trátase de dous casos nos que se detivo os presuntos agresores como autores dun delito de violencia machista e nos dous, os incidentes se desenvolvían dentro dun turismo mentres circulaban.
Ás 4:15 da madrugada do sábado 11, unha muller na rotonda da Ponte dos Tirantes na Avenida de Bos Aires reclamaba a presenza da Policía local. Cando os axentes se achegan á zona encóntranse cunha muller de 35 anos que relata como a súa parella sentimental acababa de golpeala no nariz e tamén nun dedo despois de manter unha discusión. A muller presentaba manchas de sangue, segundo recolle o atestado da Policía. Ademais, a vítima denunciou que a súa parella lle tirara os lentes graduados ademais de romperlle a chave do coche polo que non puidera mover o vehículo que se encontraba no medio da calzada. Os axentes acompáñana ata o Centro de saúde da Parda onde é atendida e despois presenta a correspondente denuncia na comisaría.
Grazas á descrición do seu presunto agresor, os axentes localizan minutos máis tarde ao home de 31 anos camiñando pola rúa Eduardo Pondal onde é detido.
OUTRA AGRESIÿN NUN TURISMO
Ao mediodía do sábado, tamén é requirida a presenza dos axentes da Policía municipal polo persoal de Montecelo que alertan de que están a atender a unha vítima de violencia de xénero. A muller indica que o seu presunto agresor debe encontrarse nas inmediacións do Centro Hospitalario pero tras unha batida pola zona non se chega a localizar o individuo.
Segundo relata a muller, sobre as 12:30 da mañá viaxaba nun vehículo cara a Vigo coa súa parella e unha menor, unha prima da vítima de 13 anos. Durante o traxecto, á altura da nave de Merkamueble en Vilaboa, estalou unha discusión que, segundo a muller, rematou cunha agesión. A continuación, o home detivo o turismo e expulsouna tanto a ela coma á rapaza. Deseguido trasladouse ao Hospital Montecelo para ser atendida.
A muller facilitou o teléfono aos axentes que se poñen en contacto co presunto agresor e lle solicitan que compareza en comisaría onde é detido. O home acusou a muller de ter sido agredido previamente por ela e quéixase de dor no pómulo polo que é trasladado ata o Centro de Saúde da Parda para que sexa atendido.