Lores defende o modelo urbano de Pontevedra no III Foro das Cidades de Madrid
Por Redacción
O alcalde de Pontevedra, Miguel Fernández Lores, participou este mércores no III Foro das Cidades que ten lugar na Feira de Madrid e explicou o modelo urbano pontevedrés como unha transformación de éxito transferible a outras cidades, ao tempo que recibiu todo tipo de louvanzas por parte do resto dos participantes.
Segundo informou o Concello a través dun comunicado, o concelleiro de Desenvolvemento Urbano Sustentable de Madrid, José Manuel Calvo, mantivo no Foro das Cidades que aspira a que a capital española goce dos mesmos índices de calidade urbana que Pontevedra, rexeitando de plano a idea de que pode lograrse en cidades pequenas e non en cidades grandes.
"Aspiramos a que non haxa cidadáns de primeira e de segunda polo feito do tamaño da cidade que habitan, e aspiramos a gozar dos niveis de calidade que ofrece Pontevedra aos seus cidadáns", sinalou o concelleiro madrileño.
Lores participou, en concreto, no espazo Novos Urbanismos para a Nova Cidade, no que tamén estiveron representantes de Donostia, Madrid e a cidade finesa de Jyvaskyla. Foi relatora da sesión Laura Hagemann, alta funcionaria europea da dirección xeral de política rexional e urbana.
O alcalde de Pontevedra, pola súa parte, falou da transformación da cidade subliñando aqueles aspectos máis conceptuais, como a importancia de ter unha visión a longo prazo, a valentía política necesaria para levar a cabo a transformación ou o valor da política como arma para cambiar a realidade das cousas, mellorándoa.
Falou da natureza global e radical do cambio, resolvendo o dilema entre dedicar o espazo aos coches ou ás persoas en favor destas últimas, e centrarse non tanto en resolver problemas de tráfico, senón aumentar a calidade do espazo público en favor das persoas.
Despois de repasar as principais dimensións do modelo e os resultados que se foron obtendo, animou aos presentes a impulsar cambios profundos e a non abandonarse nas inercias da simple xestión pública.
Relacionadas:
-
Brasil e Francia, dúas novas citas internacionais para el modelo urbano de Pontevedra
Por Alejandro Espiño |
-
Lores e a imposibilidade de mellorar o tráfico a motor nas cidades
Por Redacción |
-
Lores di en Francia que os pontevedreses defenden o modelo urbano "con uñas e dentes"
Por Redacción |
-
Las Palmas "toma nota" do modelo de Pontevedra para modificar a súa mobilidade urbana
Por Redacción |
-
Pontevedra explica en Cascais que velocidade e calidade urbana son "incompatibles"
Por Redacción |