O IES Luis Seoane, sexto na final do Club de Debate
Por Redacción
As TIC favorecen o uso do galego. Ese foi o tema sobre o que deberon debater os seis equipos participantes na gran final do Club de Debate, que se celebrou este sábado no auditorio municipal de Ferrol.
A ela chegaba un centro de Pontevedra, o IES Luis Seoane de Monte Porreiro, que rematou sexto nunha competición na que se demostrou o grande nivel de debate dos rapaces galegos e no que as puntuacións foron moi axustadas.
O gañador foi o equipo do IES de Bertamiráns, que superou por apenas seis puntos de diferenza ao IES Xulián Magariños de Negreira. A terceira praza foi para o CPI Eusebio Lorenzo Bailerón de Dodro.
Os rapaces e rapazas dos diferentes centros de ensino protagonizaron un total de seis debates. Cada equipo participou en dous debates para defender a postura a favor e a postura en contra sobre o tema a discusión.
O xurado que cualificou os debates estaba formado, entre outros, por Mercedes Torres Hermida, profesora de cursos CELGA; Tania Esperante Blanco, avogada; e Daniel Vilaverde Framil, actor, director e guionista.
O Club de Debate é un proxecto para a dinamización lingüística entre a mocidade organizado desde os concellos de Ames, Carballo, Dodro, Ferrol, Narón, Negreira, Pontevedra, Rianxo, Rois, Santiago de Compostela e Teo, coa colaboración dos equipos de normalización lingüística dos centros de ensino secundario.
Ten como finalidade contribuír ao uso oral do galego entre a mocidade e ofrecer recursos para a práctica de habilidades comunicativas e de relación interpersoal á vez que promove a reflexión e o intercambio de opinións.