Dúas infraccións nunha: co coche polo casco histórico e positivo en drogas
Por Redacción
Un condutor foi denunciado durante a pasada fin de semana por dúas infraccións nunha. A Policía Local de Pontevedra deulle o alto por circular en vehículo de madrugada por unha rúa do casco histórico prohibida para a circulación e, cando o someteron a un drogotest, deu positivo.
En concreto, o condutor deu positivo en consumo de cannabis, de modo que foi denunciado por un delito contra a seguridade viaria. Por conducir pola rúa permitida tamén se enfronta a unha sanción policial.
Este condutor foi sorprendido nas inmediacións da Praza de España. Nese mesmo momento circulaba polo mesmo lugar outro vehículo que tamén foi denunciado. Na madrugada do sábado ao domingo foron denunciados un total de oito condutores doutros tantos vehículos por intentar chegar ata a porta do pub co coche cando o casco histórico está limitado a residentes e vehículos de carga e descarga e servizos públicos.
Por outra banda, a Policía Local anunciou que a partir da 10.00 horas deste xoves 18 de outubro quedará cortada ao tráfico a rúa A Estrada no tramo comprendido entre o cruzamento coa rúa Rodríguez Seoane e a rotonda de San Amaro.
O corte prolongarase, previsiblemente, durante tres días e débese á necesidade de reparar unha arqueta de recollida de augas pluviais. Durante todo o tempo que dure o corte garantirase o acceso aos garaxes.