Sanxenxo reorganizará o mobiliario urbano para garantir a seguridade peonil en González Besada
Por Redacción
O goberno local de Sanxenxo vai levar a cabo unha reorganización do mobiliario urbano na rúa Augusto González Besada, situada preto do porto de Sanxenxo, para que se faga efectiva a peonalización desta vía.
Trátase dunha rúa céntrica e cunha importante actividade comercial e por este motivo quérese garantir a seguridade dos peóns. En González Besada atópanse numerosas terrazas e establecementos de hostalería, polo que o goberno de Telmo Martín quere evitar que se produzan situacións de perigo para os veciños e visitantes ante a presenza de tráfico rodado.
Organizarase o acceso de vehículos para veciños residentes e para o tráfico de servizo. No ano 2004 xa se acometeu a reforma integral da contorna desta rúa coa peonalización de toda esta zona.