Sanxenxo reforza os servizos durante a Semana Santa
Por Redacción
O Goberno local de Sanxenxo leva todo o mes de marzo planificando e traballando na preparación da Semana Santa co deseño dun operativo de seguridade, da limpeza de praias e outros espazos públicos e co reforzo do servizo de limpeza e recollida de lixo.
O alcalde, Telmo Martín, e o concelleiro de persoal, Marcos Guisasola, mantiveron recentemente unha reunión co alférez da Garda Civil e co inspector e o cabo da Policía Local. O obxectivo desta reunión era deseñar e coordinar un operativo de seguridade, sobre todo nas zonas de movida, nas vilas de Sanxenxo e Portonovo.
O Goberno local asegura que ten como premisa "ser moi firme e constante na mellora da seguridade do lecer nocturno ", para o que solicita a "máxima colaboración " dos propietarios dos locais. "Sanxenxo ten que ter un lecer nocturno ordenado e de calidade", apunta o alcalde Telmo Martín. Ademais, destaca que "é perfectamente posible gozar do lecer nocturno, sen alterar a tranquilidade das familias que veñen descansar".
As concellerías de servizos e medioambiente puxeron en marcha un operativo de limpeza en praias e espazos públicos, co obxectivo de que presenten o seu mellor aspecto, para a Semana Santa.
Ademais, os servizos diarios incrementaranse, reforzando a limpeza viaria no centro urbano de Sanxenxo e Portonovo, con especial incidencia en zonas hostaleiras e próximas ás praias. Tamén se reforzará a recollida de lixo de residuos sólidos urbanos ( RSU), en todo o termo municipal, para evitar desbordes.
Para lograr estes obxectivos, o persoal terá un incremento de 8 operarios e os traballos estarán organizados en limpeza viaria, recollida RSU, recollidas selectivas e servizos de lava colectores e recollida de aveños diarios. Ademais, haberá un equipo para atender calquera continxencia e imprevisto as 24 horas durante toda a Semana Santa.
Relacionadas:
-
Máis persoal no cuartel da Garda Civil de Sanxenxo durante o verán
Por Redacción |
-
Carmela Silva anima os turistas a gozar da "máxica" choiva das Rías Baixas
Por Noelia Torres Pintos |
-
Espérase tempo asollado para o Domingo de Ramos
Por David Arana |
-
Estrea da varanda de madeira entre Portocelo e Mogor
Por Redacción |
-
O Museo de Pontevedra amplía o número de visitas guiadas durante a Semana Santa
Por Alejandra Iannone |