Falece unha muller na Illa tras incendiarse o seu domicilio de madrugada
Por Redacción
Unha muller, veciña da Illa de Arousa, perdeu a vida a madrugada deste venres 9 de febreiro ao declarase un incendio no interior da súa vivenda.
Trátase dunha muller septuaxenaria, á que os servizos de emerxencia atoparon xa sen vida cando chegaron ao lugar para tentar sufocar o lume.
Segundo informa o Centro de Atención ás Emerxencias 112 Galicia, o suceso tivo lugar pouco despois das 5:00 horas da madrugada nun inmoble situado na Avenida da Ponte, preto da Casa do Mar.
Tras recibir o aviso desprazáronse ao lugar os bombeiros de Vilagarcía. O incendio afectaba á habitación na que atoparon á muller, que ardeu case na súa totalidade a excepción do armario, mentres que o resto da casa sufriu danos debido á acumulación de fume.
Aínda que non se pode precisar polo momento a orixe do lume, o servizo de extinción de incendios sospeita que a causa puido ser unha manta eléctrica atopada no cuarto, pegada a unha xanela.
No operativo despregado participaron tamén efectivos da Garda Civil e do 061, que só puideron certificar o falecemento da muller.