Concentración para denunciar o peche da delegación de Unipost
Por Mónica Patxot & Anxo Lourido
Un grupo de traballadores da delegación da empresa de servizo postal Unipost, acompañados por representantes da Confederación Xeral do Traballo (CGT), concentrábanse este martes ante a Audiencia de Pontevedra para mostrar a súa protesta polo peche da oficina en Pontevedra.
O peche supuxo o despedimento de 13 traballadores dentro dun expediente de regulación de emprego (ERE) que a empresa está a desenvolver en todo o Estado e que se está executando por fases. A protesta ante a Audiencia manifesta as discrepancias desde a CGT co proceder tanto da empresa como do Xulgado do Mercantil de Barcelona que tramita o concurso de acredores e que non contou cos representantes sindicais para aprobar o ERE.
Por este motivo, a CGT impugnou o ERE. Pide que se anule o peche das delegacións e os despedimentos de máis de 800 traballadores en toda España.
Reclaman tamén o pagamento íntegro das débedas ao persoal e un plan de viabilidade, que garanta a continuidade dos postos de traballo.