Sanxenxo reforzará este verán a plantilla da Policía Local con 26 novos axentes
Por Redacción
O Concello de Sanxenxo acaba de remitir á dirección xeral de Emerxencias e Interior a solicitude de autorización para contratar a 26 auxiliares co fin de reforzar a Policía Local durante a campaña de verán, cando a poboación do municipio experimenta un considerable incremento que o converte de forma provisional nese período como a terceira cidade da comunidade autónoma.
"O corpo da Policía Local de Sanxenxo conta con 28 funcionarios, pero para facer fronte con eficacia ó aumento incesante de poboación, residente e vacacional, que converten a este concello no primeiro destino turístico de Galicia en tempada estival, é imprescindible levar a cabo a contratación temporal de auxiliares", argumentó o concelleiro de Seguridade Cidadá, Salvador Durán.
A petición cursada pola administración local pasa por que a Xunta de Galicia inclúa a este Municipio Turístico Galego, así declarado en 1999, dentro dos casos excepcionais contemplados pola Lei 4/2007 de Coordinación de Policías Locais de Galicia, nos que se permite superar en contrataciones temporais o 50% do número de funcionarios dese corpo de seguridade.
O executivo local basea esta demanda en datos relacionados coas instalacións hoteleiras (208 con 5.295 prazas), camping (12), establecementos de alimentación, comercio, hostalería, estatísticas de recollida de residuos urbanos e consumo de auga. Ademais, fan fincapé tamén nos datos de poboación, que apuntan a 17.604 habitantes de dereito "producíndose na tempada estival picos de poboación que superan os 100.000 habitantes, o que significa multiplicar por seis a cifra de empadroados", comentou Durán.
O edil insistiu, pois, en que o Concello de Sanxenxo ten un número de habitantes moi superior ao rexistrado polo INE, organismo que outorga ao municipio a maior taxa de vinculación de toda a provincia de Pontevedra, cunha porcentaxe que ascende a 185,84%. ÿ dicir, segundo o Instituto Nacional de Estatística a media total de habitantes ligados a este concello, xa sexa porque residen, traballan, estudan ou porque pasan certos períodos de tempo, é de 32.715 persoas.
Salvador Durán motivou tamén a solicitude recordando a concesión de 14 bandeiras azuis ás praias de Sanxenxo, ademais da outorgada ao Porto Deportivo Juan Carlos I e ao Centro de Interpretación As Telleiras "co que ademais da poboación que vive en Sanxenxo en verán, temos milleiros de visitantes, sobre todo nas fins de semana".
O concelleiro matizó así mesmo que as funcións que vén desempeñando a Policía Local consisten en labores administrativas, de tráfico, de seguridade cidadá, xudicial e asistencial, ás que se suma un servizo de 24 horas en canto auxilio, vixilancia, control, inspección e denuncia. "Por iso, resulta imprescindible ampliar a persoal na época estival, o que nos permite manter a oficina aberta todo o día e reforzar os efectivos na rúa o fin de semana, cando prodúcese a maior afluencia de visitantes, e que están repartidos en quenda de mañá, serán e noite", engadiu.