Dez consellos de Sogama para un consumo responsable en Nadal
Por Redacción
Sogama, co apoio da Consellería de Medio Ambiente e Ordenación do Territorio, lanzou un decálogo de boas prácticas para consumir de forma responsable durante as festas de Nadal. Trátase de dez consellos para gozar das distintas celebracións pero dunha forma sustentable, evitando malgastar recursos.
Porque consumir de forma responsable non só implica a elección de produtos e servizos en base á súa calidade e prezo, senón tamén tendo en conta o seu impacto ambiental e social. É por isto que a planificación se erixe na primeira premisa a ter en conta, deixando de lado a improvisación e analizando con detalle que é o que realmente se necesita.
Os produtos locais e de tempada (segundo punto) identifícanse como os mellores, xa que, mediante a súa adquisición, contribúese á economía local, á xeración de emprego e á diminución das emisións de CO2 propias do transporte.
Tampouco fai falta comprar novos adornos do Nadal (3). Serven perfectamente os do ano anterior ou, mellor aínda, os elaborados con materiais reciclados.
Así mesmo, pódense felicitar as festas sen malgastar papel, tintas e sobres (4) e os envoltorios que galonan ata o último detalle, poden verse minorados (5), tan só hai que prescindir dos sobreempaquetados que moi probablemente acabarán no cubo do lixo.
Os custosos e excesivos menús do Nadal (6) constitúen un dos principais símbolos do malgaste. Non fai falta gastar grandes sumas de diñeiro en alimentos exclusivos que ven incrementada a súa cotización durante Nadal.
Os agasallos (7) son, por encima de todo, unha mostra de afecto e non é imprescindible recorrer a obxectos excesivamente caros. Unha entrada para un espectáculo ou unha xornada de aventuras pode resultar moi gratificante e albergar importantes recordos.
Ademais, os animais de compañía non son un obsequio nin un pasatempo temporal, senón unha responsabilidade (8). A adopción de mascotas constitúe a mellor alternativa para dar un fogar para ser indefensos que acabarán enriquecendo a vida das persoas que os acollen.
En canto aos xoguetes en si, o importante é que sexan educativos e seguros (9), ademais de adecuarse á idade e características dos pequenos.
Por último, Sogama lembra o importante que é que a correcta xestión dos residuos non decaia (10) e estea sempre presente cunhas sinxelas regras: reducir a produción de refugallos, aproveitar ao máximo os produtos a través da reutilización e separar as distintas fraccións na casa, depositando cada unha no colector acomodado para garantir o seu posterior reciclado e contribuíndo así ao aforro de enerxía e materias primas.