O desfile #BarroFashion Solidario pechará o sexto Nadal Solidario
Por Redacción
A asociación cultural Amigos da Fervenza da Barosa do municipio de Barro organiza un novo Nadal Solidario en Barro, que chega xa á súa sexta edición. Trátase dunha campaña de recollida de alimentos non perecedoiros para familias deste concello.
A campaña desenvolverase durante todas as festas do Nadal ata a festividade de Reis e o obxectivo é que os veciños de Barro colaboren coas persoas que se atopan con máis necesidades neste municipio.
A idea dos organizadores é alcanzar e mesmo superar a media tonelada de alimentos alcanzada durante a edición de 2016. Todos os alimentos recolleitos serán entregados aos Servizos Sociais do Concello, para que se destinen de maneira anónima a quen corresponda.
En xaneiro está prevista a celebración do desfile benéfico #BarroFashion solidario no Pazo da Crega. Neste evento preténdese recoller durante esa xornada alimentos como azucre, cacao ou aceite. Varias empresas locais e supermercados colaborarán con esta iniciativa.