Sanxenxo apura a posta a punto dos seus cemiterios
Por Redacción
A Concellería de Medio Ambiente do Concello de Sanxenxo vén acometendo nos últimos días traballos para a posta a punto dos cemiterios do municipio para a celebración do Día de Todos os Santos.
As tarefas de mantemento que se realizan ao longo de todo o ano intensifícanse estes días, co fin de que, tanto os camposantos como os seus accesos, presenten as mellores condicións na xornada de maior afluencia de persoas a estes recintos.
Para iso, o persoal municipal incide en cuestións como a limpeza de cunetas e viais de acceso, así como o acondicionamento das zonas axardinadas. Estes labores levan a cabo tanto nos cemiterios municipais, o de Padriñán e Dorrón, como nos parroquiais situados en Nantes, Bordóns, Adina, Noalla e Vilalonga.
Ademais, o concelleiro responsable da área, Juan Deza, destaca que estes días o servizo de recollida de lixo intensificará o seu traballo, xa que "se acumula moito lixo nos colectores porque os veciños tiran as flores estragadas para levar ao día seguinte os ramos e centros novos".
ROZA PARA DÚAS PISTAS MUNICIPAIS
Esta semana estará en Sanxenxo, durante catro días, a desbrozadora da mancomunidade que permitirá arrombar dúas pistas municipais, unha na Barrosa e outra en Dorrón.
A actuación consistirá no recheo das pistas con xabre e o posterior paso da coitela, para achandalo e facilitar o paso polas mesmas.