Denuncian os malos cheiros e o perigo de accidentes no xulgado e no Rexistro Civil de Marín
Por Redacción
O sindicato Alternativas na Xustiza-CUT reclama a intervención da Inspección de Traballo para que comprobe o estado en que se atopa o edificio que alberga os xulgados de Primeira Instancia e Instrución de Marín e o Rexistro Civil, sinalando que se incumpre a Lei de Prevención de Riscos Laborais.
Entre as queixas dos representantes sindicais destaca que tanto os arquivos do xulgado número 1 como o do número 2 dispoñen dun espazo moi reducido para a acumulación de expedientes e pezas de convicción. Indican que é unha estancia sen apenas ventilación e afirman que o persoal funcionario que traballa aí atópase con dificultades para respirar nesa pequena habitación.
Ademais, engaden que os traballadores corren o risco de sufrir un accidente ante as numerosas caixas e outros obxectos que impiden o tránsito por esta zona.
Por outra banda indican que a planta baixa está ocupado por unha sala do xulgado número 1 e polo Rexistro Civil, ante a falta de espazo no edificio xudicial. Alternativas na Xustiza-CUT lembra que hai un ano, realizouse un expurgo e as caixas cos documentos expurgados aínda continúan no mesmo lugar dificultando o paso. Reclaman que a administración retire ese material.
O xulgado número 2, segundo as fontes sindicais, esgotou o espazo físico no que acumular o arquivo de expedientes e pezas de convicción e ao final acaban almacenándose en diferentes zonas dos xulgados. Esta situación supón, segundo os representantes dos traballadores, un risco en caso de incendio ou dunha urxencia.
Os traballadores do Rexistro Civil tamén teñen que facer fronte a complicacións polo cheiro "insoportable" que se desprende dos libros antigos, cheos de humidade e po. Sinalan que a Dirección Xeral de Xustiza continúa sen responder á solicitude para que sexan restaurados e tampouco dota dun aparello deshumidificador a estas oficinas.
As carencias tamén se centran na ausencia dunha instalación de aire acondicionado. Apuntan que, a petición do sindicato, a Dirección Xeral dotou as instalacións duns aparellos refrigerantes, que ocupan un amplo espazo, xeran un ruído "insoportable" e afirman que o tubo de expulsión do aire quéntase sendo un risco para os traballadores.
As xanelas tampouco pechan completamente e fíltrase o aire e o ruído exterior, ademais os traballadores golpéanse constantemente con arestas de mobiliario e outros elementos ao non existir un mínimo espazo entre os postos de traballo e as zonas de paso. O sindicato asegura que o persoa sofre numerosos negróns nas extremidades inferiores debido aos continuos golpes.
Por último, Alternativas na Xustiza-CUT, a través de Pablo Valeiras, denuncia que non existe un plan de evacuación nin un protocolo para casos de emerxencia e reclama unha intervención inmediata de Inspección de Traballo e da Dirección Xeral de Xustiza da Xunta de Galicia.