Nos sindicatos alégranse polo descenso do paro pero cren que se debe á Semana Santa
Por Anxo Lourido
A baixada no número de desempregados, 347, durante o mes de marzo na provincia é un resultado positivo, segundo afirman os sindicatos pero se amosan pouco optimistas en que isto teña continuidade no futuro.
Ramón Vidal, secretario comarcal de UGT, indica que "as contratacións no sector servizos é onde se ve o tirón. Pero o resultado é peor que hai un ano. Reduciuse un 50%. E no interanual teñen un saldo negativo de 5.448 traballadores máis no paro. Os nosos mozos cada vez teñen máis dificultades e no sector primario tampouco hai contratacións. Pero ademais está afectando a contratación ao sector terciario e as visitas que antes tiñamos na época de vacacións non se repiten porque xa non hai o mesmo poder adquisitivo".
O secretario comarcal de Comisións Obreiras, José Luis García Pedrosa, indica que "se da unha reducción do desemprego en Galicia e nas comunidades onde hai certo nivel de turismo pero acompañou é moi cativa. O que se podía esperar nunha situación normal de Semana Santa tampouco foi así". Sinala ademais que "o paro se reduce no sector servizos e na construción e na industria pero seguimos falando de migallas porque o nivel de desemprego é altísimo e a reforma laboral e as medidas das administracións non serven para xerar emprego e as expectativas seguen sendo moi malas. E este mes volverá haber un incremento do paro porque non vai haber unha reducción do desemprego. ÿ estacional."
Dende a CIG, o secretario comarcal Rafael Iglesias alertaba de que "é necesario crear políticas que incentiven o consumo, porque a baixada do consumo nos leva ao paro". Segundo sinala o responsable do sindicato nacionalista estas contratacións foron na maioría para o sector servizos e por poucos días.
Os tres secretarios comarcais coinciden en sinalar o dato do pasado mes como bo pero temporal e que só se pode asociar ao sector servizos polas contratacións durante a Semana Santa.
A Xunta valora positivamente o descenso, pero pide cautela
Unha visión máis positiva ofrece a Xunta de Galicia. A directora xeral de Emprego e Formación, Ana María Díaz López, valorou o feito de que descendera o número de parados, aínda que matizou que hai que tomar este dato con cautela e esperar á evolución dos próximos meses. Asegura que Galicia foi a terceira comunidade española na que se rexistra unha maior baixada do número de parados, tanto en termos absolutos como en relativos.
Salientou que se trata da primeira diminución dun mes de marzo desde 2008, e precisou que, remitíndose ao histórico desde 2005, esta é a terceira maior baixada nestas datas. Ademais, Galicia representa case o 35 por cento da baixada total do Estado. Fixo fincapé, tamén, na contención da destrución de emprego que se reflicte, dixo, na evolución interanual.