15 menores observan de preto como é a realidade laboral en Cambados
Por Redacción
A Xunta de Galicia ten en marcha o programa 'Deseñando o teu futuro' destinado a mozos con idades comprendidas entre os 14 e os 18 anos para que, a través de visitas a distintas empresas, comproben como é a actividade laboral.
15 mozos de Cambados participaron desde o 18 de agosto ata este venres para analizar as diferentes opcións profesionais e desta forma visitaron adegas, asociacións culturais e establecementos comerciais para coñecer como se desenvolve a xestión destas entidades, do mesmo xeito que comprobaron o funcionamento da escola infantil municipal e a lonxa de Cambados.
A esta visita acudía a directora xeral de Xuventude, Participación e Voluntariado, Cecilia Vázquez, que acompañou os participantes e explicou que esta iniciativa permite que os asistentes aprendan e fomenten o seu autocoñecemento, ademais de motivarse no seu proceso de formación e actualización de habilidades a través dunha experiencia de educación non formal.