A administración electrónica chegará a 55 concellos da provincia
Por Redacción
Un total de 55 concellos da provincia e unha entidade menor adheríronse ao plan da Deputación de Pontevedra para implantar a administración electrónica e dar cumprimento á lexislación vixente relativa ao acceso electrónico da cidadanía ás actuacións públicas.
O plan da Deputación, que suporá un investimento de 847.000 eros, implica a implantación, uso e soporte dunha solución de administración electrónica para os concellos de menos de 50.000 habitantes. Preténdese facilitar que os concellos que non conten cos recursos suficientes poidan levar a cabo a adaptación e modernización tecnolóxica.
A principal característica deste plan é que se trata dun modelo de servizo ofrecido na nube. En 36 concellos xa se comezou a implantar a administración electrónica, dando formación a preto de 2.100 empregadas e 700 cargos públicos.
A través desta actuación, a Deputación de Pontevedra está a impulsar solucións de administración electrónica para que os concellos poidan dispoñer dunha sede electrónica personalizada para a súa relación coa cidadanía e, por outro lado, un portal para que o persoal da administración local poida realizar a xestión integral dos procedementos e expedientes por medios electrónicos.
A través desta ferramenta poderase consultar un catálogo de servizos electrónicos de trámites, consultas de expedientes, procedementos, etc. que se poden iniciar de forma telemática e presentar no rexistro electrónico sen necesidade de realizar un desprazamento presencial ás administracións.
A Deputación de Pontevedra está a implantar as aplicacións necesarias, a impulsar un plan de formación orientado á aprendizaxe dos aspectos técnicos e funcionais da nova ferramenta para a súa posta en funcionamento, un soporte aos usuarios para resolver consultas, o mantemento correctivo, evolutivo e perfectivo dos servizos, a súa actualización e a inclusión de novas funcionalidades, sempre en estreita colaboración cos servizos informáticos dos concellos da provincia adscritos á iniciativa.
Relacionadas:
-
O PP asegura que a Deputación incumpre a Lei de Administración Electrónica
Por Redacción |
-
A Deputación impulsa un novo sistema informático para que os concellos pequenos actualicen o padrón
Por Redacción |
-
Carmela Silva presume de administración electrónica ante outras deputacións
Por Redacción |
-
Barro estrea a súa sede electrónica
Por Redacción |
-
A administración electrónica dos pequeños concellos 'vai a conta' da Deputación
Por Redacción |