Melloras no acceso ao lugar de Verdugo
Por Redacción
O Concello de Ponte Caldelas deu por finalizadas as obras de asfaltado integral e dotación de grellas de recollida de augas pluviais no tramo final do acceso ao lugar de Verdugo. Os traballos tamén se centraron en soterrar o tubo de abastecemento ás tres vivendas que se atopan na zona e a un establecemento de restauración de recente apertura.
Esta zona, segundo o goberno local, atopábase en moi mal estado con fochancas e espazos nos que se acumulaba a auga. Coas obras, a vía ofrece un asfalto uniforme. A mellora realizouse a partir do ensanche que serve de aparcadoiro para os clientes dun establecemento hostaleiro na contorna dos muíños de Taboadelo.
O goberno tripartito deste municipio inclúe esta obra dentro das intervencións realizadas para solucionar zonas de difícil acceso en distintos núcleos de poboación. O alcalde Andrés Díaz anuncia que ten previsto iniciar unha nova quenda de actuacións durante os próximos meses.
Segundo Díaz, estes traballos están a realizarse por petición directa dos veciños e mantendo o máximo respecto á contorna natural e etnográfica.