Sorprenden seis mozos, un deles menor, roubando material informático dun colexio de Sanxenxo
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
In fraganti. Así atrapou a Garda Civil de Sanxenxo a cinco mozos de entre 21 e 19 anos e a un menor de idade, todos eles veciños de Cangas. Atopábanse no interior dun colexio infantil do municipio e intentaban levarse material informático. A todos eles impútaselles un delito de roubo con forza.
Os feitos sucederon na mañá deste sábado cando unha patrulla do cuartel da Garda Civil de Sanxenxo sorprendeu dentro do CEIP de Portonovo aos seis mozos portando mochilas. No seu interior, os axentes atoparon diverso material informático tales como: ordenadores portátiles infantís, tres portátiles de sobremesa, catro proxectores, dúas pantallas de ordenadores, unha torre CPU, micrófonos, entre outros.
Tras avisar ao director do centro, púidose comprobar como os mozos provocaran numerosos estragos no material informático e mobiliario do centro.
Por todo iso procédese á identificación e imputación de ditos mozos por un delito de roubo con forza. As dilixencias foron entregadas no Xulgado de Instrución número 3 de Cambados, onde os detidos terán que presentarse cando sexan requiridos, excepto o menor que o fará ante a fiscalía de menores.