Agárdase que a vendima comece a finais de agosto ante a avanzada maduración
Por Redacción
A Estación Fitopatolóxica de Areeiro (EFA), centro dependente da Deputación de Pontevedra, vén de asegurar no seu último aviso fitosanitario que xa "non é probable" que se produzan danos por botrite nas viñas aínda que haxa periodos con condicións favorables á enfermidade no que queda de campaña. Así mesmo, os técnicos subliñan que pese a que as temperaturas desta semana non foron moi elevadas, continúa o avance na maduración das uvas, e nas zonas máis adiantadas xa se fala da vendima para finais do mes de agosto.
En canto á botrite, que os técnicos definiron como o patóxeno máis perigoso de cara ao final da campaña nos últimos avisos, a día de hoxe subliñan “que se a uva se mantivo sa ao longo do ano” o risco de danos é moi baixo. En calquera caso, destacan que neste momento existen no mercado funxicidas antibotríticos que aínda se poden aplicar dirixidos aos acios polo seu menor prazo de seguridade (14 días). No caso de non poder xa intervir debido á limitación da data do último tratamento por parte das adegas, débese asegurar no posible a correcta aireación dos acios e reducirse o risco de instalación do fungo sobre eles eliminado os grans afectados.
Por outra parte, aínda que as condicións climáticas foron favorables ao Mildeu, apenas se notou unha evolución na porcentaxe de follas con manchas e a sintomatoloxía non debería ter maior incidencia nas viñas. Así mesmo, apenas se atopou presencia de Oídio nalgúns acios, que deben ser eliminados se son moi abundantes, tanto para evitar potenciais danos por botrite como para favorecer aos gromos produtivos. Sobre a erinose, aínda que se detectaron novos gromos con síntomas, non se require tratamento na provincia.
CÍTRICOS
Nesta semana, o centro fitopatológico dependente da Deputación detectou unha abundante presenza de insectos adultos e ninfas novas de diferentes especies de moscas brancas, psila africana ou pulgóns. Nos que caso en que apareza recoméndase un tratamento para evitar a instalación de fungos de negrilla sobre as sustancias azucradas que emiten.
En canto ás nogueiras, desde o Areeiro indícase que no mes de xuño colocáronse trampas para detectar "moscas de casca verde da noz" nunhas nogueiras da comarca de Pontevedra. O voo da especie comezou na terceira semana de xullo, pero nas últimas dúas semanas está a rexistrarse un maior número de capturas. Trátase dun insecto que destrúe a casca verde, que podrece e sécase. Disminuy a calidade e a cantidade das noces porque nos ataques temperáns provocan a caída do froito que se forma.
En España non hai insecticidas específicos para o control desta praga, polo que é necesario eliminar os froitos caídos ao chan para evitar que as larvas se enterren para transformarse en crisálida.