Salvados por un sinal
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/252/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/595a63486a-20170703-patxot-accidente-altamira-005.jpg)
© Mónica Patxot
![](/web/cache/scene/uploads/fotos/foto/00e/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/595a63614d-20170703-patxot-accidente-altamira-002.jpg)
© Mónica Patxot
Suspendido unicamente por un sinal de tráfico dobrado. Así quedou un coche, tras un descoido da súa condutora, na rúa Altamira de Pontevedra. A fortuna impediu que o suceso tivese consecuencias maiores para os dous ocupantes do vehículo, que evitaron caer por un desnivel.
O suceso, segundo relatou a propia condutora a PontevedraViva, ocorreu sobre as 13.00 horas.
"Púxenme nerviosa á hora de aparcar e pisei o embrague en lugar do freo", asegurou a muller, que recoñeceu que "habitualmente non adoito conducir".
A muller, acompañada do seu pai, acababa de regresar a Pontevedra desde Boiro e trataba de estacionar o seu vehículo na rúa.
O sinal, que indica que a zona ten limitados os seus aparcadoiros en horario comercial, quedou dobrada sobre o desnivel, duns dous metros, soportando gran parte do peso do vehículo e impedindo que se precipitase desde as alturas.
Ao nerviosismo propio do momento, sumouse a indignación da condutora ante o atraso da chegada do guindastre, que tardou case dúas horas, ao temer que o sinal podería ceder ante o peso do coche.