Un condutor sancionado pola Policía Local por dirixirse bébedo a eles tras ser alertados por un niño de avespa asiática
Por Redacción
A Policía Local de Pontevedra denunciou un condutor por levar un turismo baixo a influencia do alcol. Ocorreu na noite do domingo 11 no barrio da Seca, pero, ademais da sanción en si, a noticia vén dada polas circunstancias nas que o pillaron. O home saíu ao encontro dos axentes que se desprazaron á zona ante a presenza dun niño de avespa, chamoulles a atención e el mesmo lles puxo en bandexa que o denunciasen.
Segundo informou a Policía Local, un veciño chamounos sobre as 21.30 horas alertando da presenza dun niño de avespa asiática nunha leira da Seca situada ao fondo dunha rúa estreita e sen saída. Ao final desa rúa había un muro e, pola parte interior do mesmo, a citada leira na que apareceron as avespas.
Os axentes activaron o protocolo habitual neste tipo de casos e alertaron os bombeiros. Estaban a esperar a súa chegada cando viron que se achegaba un coche. O seu condutor meteuse pola rúa sen saída, aparcouno nunha zona prohibida e dirixiuse a eles. Nada máis achegarse, notaron que presentaba un forte cheiro a alcol e enfrontouse a eles preguntándolles que pasaba e indicándolles que a leira era da súa propiedade.
Ante as evidencias de que conducira ata alí bébedo, sometérono ao correspondente test de alcoholemia, no que deu un resultado positivo de 0,50 miligramos de alcol por litro de aire expirado. Repetíronlle a proba uns minutos despois e aínda arroxou unha taxa superior, de 0,59.
O condutor non reaccionou ben ao positivo no test e empezou a discutir a berros con eles sobre o funcionamento do alcoholímetro. Nese momento, chegou a súa esposa e levouno de regreso a casa.
Os axentes impuxéronlle unha sanción por conducir baixo os efectos do alcol, que implica a retirada de seis puntos do carné e unha multa económica de 1.000 euros.