Dá positivo tras fugarse dun control en Bueu e bater contra un farol
Por Redacción
Un home de 50 anos, veciño de Bueu, foi denunciado pola Garda Civil despois de dar positivo por alcoholemia, darse á fuga do control ao que fora sometido e terminar a súa huída chocando contra un farol en Beluso.
Segundo informou o instituto armado, o condutor fuxiu dun control que se estaba realizando no centro de Bueu ás 05.00 horas desta pasada madrugada.
Tras cinco minutos circulando de forma temeraria e a gran velocidade, perseguido por dúas patrullas da Garda Civil e unha terceira da Policía Local, o coche acabou impactando contra un dos farois situados na baixada á praia de Beluso.
O condutor deu 0.82 na proba de alcoholemia, tres veces máis do permitido. Ademais, o coche non tiña seguro.
Os axentes instruíron dilixencias por dous delitos contra a seguridade viaria, un por condución temeraria e outro por superar a taxa de alcol permitida.
O denunciado ía acompañado doutra persoa, un mozo de 24 anos, que unha hora antes, no acceso a Bueu pola estrada PO-551 que vai de Marín a Rande, xa fora denunciado por superar o límite de alcoholemia. O seu vehículo, en que o primeiro destes dous homes, viaxaba de copiloto, quedara inmobilizado.