Lérez celebra a procesión do Cristo da Consolación
Por Redacción
Decenas de veciños participaban durante a noite deste sábado 27 na tradicional procesión do Cristo da Consolación na parroquia de Lérez.
Trátase dun acto relixioso no que a comitiva partía, este ano, da vivenda da familia Tomé Loureiro en Cimbelo. Esta familia realizara a ofrenda ao Santísimo Cristo da Consolación e foi a encargada de organizar a elaboración das vistosas alfombras florais.
Numerosos veciños dedicáronse, durante a tarde-noite do venres, a adornar con pétalos e flores a base deseñada para dar forma a este manto.
A imaxe do Cristo crucificado iniciaba o percorrido ás 21.00 horas e numerosos fieis acompañaban con candeas a procesión ata chegar ao Mosteiro de Lérez onde se celebraba o acto litúrxico.
Este evento forma parte das actividades que organiza a asociación cultural Santísimo Cristo del Consuelo de Lérez, que se atopa activa desde o ano 1985, e a ofrenda realízase no mes de maio.