O concurso Tui-Santiago da Brilat reunirá o 31 de maio 21 patrullas de España e Portugal
Por Natalia Puga
Un total de 126 militares dos tres exércitos españois e de Portugal participarán este ano no concurso de patrullas Tui-Santiago da Brigada de Infantería Lixeira (Brilat), que comezará o próximo 31 de maio co reto de percorrer os 120 quilómetros que separan Tui de Compostela nun máximo de 34 horas e 40 minutos.
A proba retoma a súa época de celebración habitual antes do aniversario da brigada, o 7 de xuño, tras pasar o ano pasado ao mes de setembro. Partirá o mércores 31 ás 8.00 horas do embarcadoiro de Tui e está prevista a chegada das patrullas entre as 4.00 e as 18.00 horas do 1 de xuño.
O concurso segue na liña da internacionalización que comezou hai anos e este 2017 participarán 21 patrullas de seis membros cada unha, das que 10 son de militares da Brilat, dez doutras unidades das Forzas Armadas de España e unha de Portugal. A cantidade de participantes estranxeiros fora récord o ano pasado, con catro grupos, con motivo do 50 aniversario da brigada.
Este ano, as unidades do resto de España que participan son 'Guzman el Bueno' X, a Lexión, 'Extremadura' XI, a Brigada Paracaidista, 'Aragón' I (con dúas patrullas), Rexemento de Artillería de Campaña 11, Terzo Norte de Infantería de Mariña de Ferrol, Terzo Norte de Armada de Cádiz e o grupo de seguridade de Exército do Aire.
A Brilat facilitou este martes os detalles da proba, que, como é habitual, busca fomentar o espírito de cohesión e reforzar a identidade colectiva de Forzas Lixeiras, facendo extensivos os lazos de unión ao resto de Exércitos que compoñen as Forzas Armadas, dar a coñecer o nome da brigada e estreitar as relacións tanto no ámbito militar como o civil, ao ser a proba ao longo do Camiño de Santiago.
A proba inclúe este ano un cambio ao reducir de oito a sete quilos o peso mínimo que deben levar os participantes, que van en uniforme de campaña e portan o seu armamento individual e todo o seu equipo regulamentario. Ademais de estipular ese peso e o máximo de tempo para o percorrido, os participantes deben realizando sete probas distintas, un percorrido topográfico, tiro de precisión, pista de obstáculos, rápel, cruzamento de rio a nado, percorrido cronometrado e lanzamento de granada de man.
Como é xa habitual, desas sete probas, varias serán en Pontevedra e arredores. O tiro de precisión e a pista de obstáculos realízanse na base Xeneral Morillo da brigada en Figueirido e as probas de rápel e cruzamento de rio a nado en Pontevedra, na ponte de Monte Porreiro a primeira e a contorna da praia fluvial a segunda.