Adxudican por 324.000 euros o programa de igualdade 'Conectadas' 2017
Por Redacción
A Deputación de Pontevedra adxudicou por 324.000 euros o contrato para a execución dunha nova edición do programa Conectadas 2017, que ten por finalidade mellorar a formación básica das mulleres para favorecer as súas relacións interpersoais e o intercambio de experiencias, ao tempo que contribúe á mellora da súa empregabilidade e mantemento no mercado de traballo e se reduce a súa brecha dixital mediante a formación nas novas tecnoloxías.
A presidenta da Deputación, Carmela Silva, anunciou que a adxudicación é a UTE formada polas empresas Forox Innovación, S.L. e Marexada, Deporte, Lecer e Cultura, S.L., gañadora do procedemento aberto de contratación convocado.
O programa terá este ano máis de 300 accións formativas. Promovido polo servizo de Igualdade da Deputación de Pontevedra, busca potenciar a participación e a promoción das mulleres e, deste xeito, "favorecer a súa posición na sociedade, onde as mulleres somos o 52%", segundo lembrou Carmela Silva.
O programa está destinado ás asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, que apoien o seu desenvolvemento e empoderamento, ao igual que o seu tecido asociativo e a paulatina consecución do obxectivo da igualdade entre mulleres e homes.
Cada unha das asociacións poderá desenvolver unha única acción formativa que suman un total de 47 obradoiros distribuídos entre oito bloques temáticos: 'Muller emprende' (emprendemento), 'Muller e cultura' (dedicado ás artes visuais), 'Actualízate' (alfabetización dixital), 'Coas túas mans' (traballos manuais), 'Porque ti o fas' (xardinería e ornamentación floral), 'Súmate ao cambio' (cociña, costura, coidados e dependencia, corresponsabilidade, reciclaxe, bricolaxe…), 'Ponte en forma' (deportes) e 'Coidados persoais'.