Este sábado 13 de maio ten lugar en Kiev a final de Eurovisión 2017. Un certame que na memoria dunhas cantas xeracións gravou aquilo do "guayominí sept puans". Algúns quedaron no "Enséñame a cantar" de Micky; no lastre de ¿Quién maneja mi barca? de Remedios Amaya, ou se engancharon co "Europe's living a celebration" de Rosa López.
Cristina Prieto, Antón Prieto e Luís Miguel Alonso, son seguidores de Eurovisión e acompáñannos nestas Conversas na Ferrería de PontevedraViva Radio. Este sábado reuniranse con amigos e con familia para seguir a final do festival. Nesta charla falamos das representacións favoritas, de gañadores nas apostas que se realizan, de propostas arriscadas, de postas en escena, etc...
Coñecemos como é o procedemento do festival actual e algunhas das súas reviravoltas: por que Alemaña, España, Francias, Italia, Reino Unido e Ucraína estarán na final sen ningunha das eliminatorias previas?, Por que Rusia foi apartada dos 43 participantes?, existen lobbies de presión en Eurovisión?, que historias persoais hai detrás dalgúns dos participantes?
E... Que países están entre os favoritos destas Conversas? Podémonos equivocar...ou non: Italia, Portugal, Bélxica, Moldavia, Suecia e Francia. Se aínda non as escoitaches podes coñecer todas as cancións de Eurovisión escoitando estes días o streaming de PontevedraViva Radio.