Nauta encarga un novo guindastre Travel Lift por 219.005 euros
Por Redacción
O Consello de Administración de Nauta Sanxenxo adxudicou a adquisición dunha guindastre pórtico mariña tipo travel lift provista de pluma para desarbolado, á empresa Electromecánicas GH por un importe de 291.005 euros IVE incluído, que será servida nun prazo de catro meses.
Nauta Sanxenxo, empresa pública que xestiona o porto deportivo, dotarase así dun novo pórtico automotor que asegure o varado dos barcos e a rápida adaptación ás diferentes medidas dos mesmos dentro dos parámetros de peso, capacidade, eslora e manda definidos pola propia empresa. Trátase por tanto dun guindastre que posibilitará o izado dos veleiros deportivos de maior envergadura con quilla profunda tal e como require a empresa para a correcta operativa do porto, e que non adoita ser unha dimensión estándar, facendo necesaria unha fabricación a medida.
Entre as características técnicas esixidas ao novo travel lift destacan unha capacidade de elevación de 60 toneladas como mínimo; unha altura libre interior baixo pastecas de 9.000 mm e ancho libre de 7.400 mm, así como unha pluma de desarbolada para 800 quilos, aproximadamente.
Estes requirimentos están relacionados co tamaño e o peso da frota de embarcacións usuarias do servizo.
O travel lift actual desempeña a súa función para a empresa Nauta Sanxenxo SL desde o ano 2001, aínda que se atopaba xa en funcionamento no varadero do Porto Deportivo de Sanxenxo antes da súa adquisición por parte da empresa pública.
A funcionalidade do guindastre foi empeorando nos últimos anos e os problemas que presenta na actualidade son evidentes, tanto no propio sistema estrutural do pórtico como nos sistemas motrices hidráulico e mecánico, o que obrigou a reducir de forma drástica a súa utilización ata pesos máximos de 30 toneladas e mesmo a extremar as precaucións a partir de 25.