Un traballador quéimase con cloro na cara nunha casa en rehabilitación en Perfecto Feijóo
Por Redacción
Un traballador autónomo resultou ferido e tivo que ser trasladado ao Hospital Montecelo de Pontevedra tras sufrir un accidente laboral mentres traballaba na mañá deste martes nas obras de rehabilitación dunha vivenda na rúa Perfecto Feijóo da cidade.
Segundo informou a Policía Local de Pontevedra, o operario tiña lentes e luvas protectores, pero, de todos os xeitos, cando estaba a manipular un produto con cloro, salpicoulle á cara e sufriu queimaduras que requiriron asistencia médica.
Segundo indicou o Centro de Atención de Emerxencias de Galicia 112, o aviso do accidente laboral recibírono sobre as 11.30 horas e, tras a alerta, solicitouse a intervención das policías Local e Nacional, os efectivos de Protección Civil e Urxencias Médicas de Galicia.
Fontes policiais indicaron que foi necesario o seu traslado ao hospital, pero as queimaduras que presentaba tiñan un prognóstico inicialmente leve. De todos os xeitos, será necesario ver a evolución nas próximas horas.