As demandas do Monte Pituco chegarán á Deputación
Por Oskar Viéitez
O deputado provincial, Xosé Lois Jácome, único representante na Deputación da coalición Son, mantivo este sábado unha xuntanza coas concelleiras da Marea de Marín e membros da asociación Monte Pituco en defensa do Monte Pornedo. Jácome vén facendo unha serie de actos neste último mes co obxectivo de "mellorar a organización de cara as eleccións municipais" así como de poñer en valor as vilas da provincia.
Nun comunicado de prensa salientou como o PXOM de Marín ten catalogado o espazo do Monte Pornedo como "solo industrial" e curiosamente ó carón do tamén coñecido como Monte Pituco está o límite administrativo co Concello de Pontevedra "que ten clasificado o solo como de interese arqueolóxico".
"Atopámonos ante dúas figuras urbanísticas totalmente opostas e separadas por unha liña imaxinaria", destaca. O deputado provincial, que visitou e fixo parte do roteiro do Monte Pornedo esta fin de semana, tivo oportunidade de observar ditos xacementos arqueolóxicos cos que o Concello de Pontevedra pon en valor dito solo.
"Non entendemos como o Concello de Marín pode tomar unha posición tan oposta ó de Pontevedra, tendo en conta o valor patrimonial e histórico que contén este monte", valorou. "Isto é grave, pois se nun futuro Marín precisase dun polígono industrial, a súa construción levaríase a cabo en dito monte, o cal é actualmente de uso e desfrute da veciñanza marinense".
É intención do deputado apoiar as asociacións que están traballando na defensa do Monte Pituco, "especialmente no plano divulgativo", a través da posta en valor do patrimonio arqueolóxico e da promoción deste enclave como espazo de interese ambiental e paisaxístico. O deputado provincial, amosa o seu "absoluto apoio" ás reivindicacións destes colectivos e rexeita "enerxicamente" a posible construción dun polígono industrial nesta zona natural de lecer.
Jácome, tamén recolleu outras demandas da vila de man das concelleiras da Marea Marín, presentado especial atención á posta en valor dos muíños do río Loira, que espera que se inclúan no plan de protección do patrimonio arqueolóxico.
Ademais, tamén tomou conta das estradas xestionadas pola Deputación, onde moitas precisan mantemento, iluminación e sinalización correcta para unha mellora da seguridade vial. Por último, as representantes de Marea de Marín e o deputado de Son coordinaránse na posta en común dunha moción local "para rematar co desleixo do Concello de Marín en relación ó Lago de Castiñeiras que tanto valor natural ten para a veciñanza".
Relacionadas:
-
O TSXG anula a clasificación do Monte Pituco como chan industrial no Plan Xeral de Marín
Por Oskar Viéitez |
-
"Barferencia" de Antonio Costa sobre os petróglifos de San Xián
Por Redacción |
-
O TSXG declara firme a sentenza que ordena á Xunta retirar o polígono Marín-Pornedo
Por Redacción |
-
O TSXG dá a razón á asociación Monte Pituco e ordena á Xunta retirar o polígono Marín-Pornedo
Por Redacción |
-
Conclúe a pavimentación do camiño de Arealonga-Pituco
Por Oskar Viéitez |
-
Andaina para demandar a protección do Monte Pituco
Por Redacción |