Detido por agredir un mozo que ingresaba cartos nun caixeiro para tentar roubarlle
Por Redacción
Axentes da Policía Local de Pontevedra detiveron sobre a unha da madrugada deste mércores 15 de marzo un mozo de 21 anos como presunto autor dun delito de tentativa de roubo con violencia e intimidación que supostamente cometeu pouco antes na rúa Xosé Malvar cun compinche que foi identificado, pero non detido.
O intento de roubo ocorreu pouco antes, sobre as 00.55 horas, cando un mozo de 19 anos estaba ingresando diñeiro nun caixeiro da oficina de Abanca situada entre as rúas Xosé Malvar e A Seca. Dous individuos agredírono para intentar sacarlle os cartos, pero non remataron porque unha parella que circulaba en coche pola zona presenciou o que estaba a suceder e prestoulle axuda.
Nese momento, os dous presuntos ladróns fuxiron mentres a vítima e a parella que lle axudou dirixíronse á Xefatura da Policía Local para relatar o que acababa de pasar. Os axentes municipais montaron un dispositivo pola zona e lograron localizar os presuntos ladróns a poucos metros do lugar do intento de roubo, na rúa Fernando Olmedo.
Un dos mozos localizado foi identificado pola vítima e as testemuñas como o autor da agresión durante o intento de roubo, polo que os axentes da Policía Local de Pontevedra procederon á súa detención e traslado a dependencias policías para a súa posta a disposición xudicial.
Por mor da agresión sufrida, o mozo de 19 anos ao que intentaron roubar presentaba unha contusión no ollo dereito e molestias na boca.