Efectivos do GRECO con metralletas entran no Lidl da avenida de Vigo para deter dous presuntos narcos
Por Redacción
Creada e actualizada
Creada e actualizada
Unha espectacular operación desenvolvida por efectivos da unidade especial do Grupo de Resposta Especial para o Crime Organizado (GRECO) da Policía Nacional tiña lugar a últimas horas da tarde deste luns no supermercado da cadea Lidl situado na avenida de Vigo.
Membros deste grupo, vestidos de paisano, entraban ao redor das 21.30 horas da noite, armados con metralletas e pistolas no establecemento comercial ante a sorpresa dos clientes que se atopaban nese momento no supermercado.
Os axentes detiveron dúas persoas que se atopaban no centro como clientes encapuchándoos e facéndoos subir nun dos furgóns policiais que se presentaron no aparcadoiro do local comercial. Fontes oficiais da cadea de supermercados confirmaron que os detidos non son empregados, senón clientes, pero descartaron facilitar máis detalles.
Os dous detidos atópanse nos calabozos da Comisaría de Pontevedra, segundo fontes da Policía Nacional. Dentro desta operación, que continúa aberta, detivéronse, como mínimo, oito persoas máis na cidade de Vigo durante as últimas horas. Todas elas están acusadas de actividades ilegais relacionadas co narcotráfico nuhha investigación coordinada polo Xulgado de Instrucción número 4 de Vigo.
Segundo a información facilitada polo Tribunal Superior de Xustiza de Galicia non está previsto que os detidos pasen a disposición xudicial nin este martes nin mañá, mércores.