O PP recolle as queixas dos veciños polas carencias do parque infantil de Monte Porreiro
Por Redacción
A concelleira popular, María José Rodríguez Teso, denunciaba este xoves as deficiencias que presenta o parque infantil de Monte Porreiro. Tras recoller as queixas veciñais na urbanización sinala que as obras se están acometendo con atraso e non cumpren co que o goberno local do BNG prometera.
Afirma que a ampliación anunciada redúcese a un lateral e os xogos do parque en lugar de ser para escolares de todas as idades unicamente teñen como destinatarios menores de 7 anos.
Denuncia ademais que a pesar de que os veciños reclamaron a retirada dunha randeeira que se atopaba en mal estado, o xogo continúa no mesmo lugar.
O portavoz do grupo municipal do PP, Jacobo Moreira, aproveitou esta comparecencia para lamentar a prórroga do servizo de abastecemento de auga. Sinala que o BNG sabe desde hai dúas décadas que a concesión finalizaba este mes e, con todo, non preparou un novo contrato.
Engade que esta situación está a repetirse con diferentes contratos como o das piscinas de Campolongo, que suma xa oito prórrogas, co de mantemento de xardíns e coa recollida de lixos. Moreira asegura que a maquinaria do Concello atópase paralizada con proxectos e renovacións de contratos que se atopan conxelados.