Tráfico trata de esclarecer as causas dun accidente na vía rápida de Cambados
Por Oskar Viéitez
Axentes de Tráfico da Garda Civil tratan de esclarecer as causas dun accidente rexistrado na tarde-noite deste xoves na vía rápida de Cambados a Ribadumia.
Segundo as versións trasladadas polos condutores dos dous vehículos sinistrados, un coche invadiu o carril contrario mentres adiantaba de maneira incorrecta obrigando aos coches que circulaban correctamente a botarse á beiravía para evitar a colisión.
Os vehículos afectados impactaron contra a varanda, mentres que o coche que provocou o accidente continuou a súa marcha sen deterse.
Desde Protección Civil de Cambados informaron que foi necesario evacuar ao Hospital do Salnés ao condutor dun dos turismos A.M.O. de 35 anos que, en principio, o seu estado non parecía revestir gravidade. Presentaba dor no costado e na clavícula esquerda e cortes.
Iso si, durante media hora cortouse o acceso á vía rápida na rotonda de Vilariño pola Garda Civil que estivo a dirixir o tráfico ata a limpeza e retirada dos vehículos.